JUDY的部落格

頂個月，學校的通識教育中心邀請了蕭建華先生來演講，佇學校內面ê欒風咖啡廳，聽完了伊ê演講後，我就kap同學借「不倒ê蘆葦」這本冊來看，佇這本冊內面有koh-khah詳細ê伊ê生命故事，看了這本書了後，真正會感覺其實咱每一个人攏足幸福， 應該要愛好好珍惜，mài koh 怨嘆生活中ê不如意。

雖然伊自出生ê時陣就無爸無母，生活mā 一直過了真艱苦，甚至是佇伊辛辛苦苦讀完大學了後，才得到這種怪病，但是伊並無怨嘆天公伯，顛倒是koh-khah勇敢去面對人生ê未來。

伊除了共逐家講伊ê故事，伊mā教逐家好ê代誌愛及時去做。真濟代誌、真濟道理其實咱攏bat，但是真正有做到的並無濟，親像咱自細漢就知影愛有孝爸母，但是有真濟人攏到爸母離開家己ê時陣才後悔當初是按怎無愛聽in講ê話，早知影無應該佮in冤家，但是，有孝爸母ê道理咱攏早就知影a，甘毋是？

蕭建華先生實在是一个真勇敢ê人，看了他ê故事了後，真正予我足感動，想袂到世間上竟然有tsiah-nih 樂觀ê人，一世人tú-tio̍h 遮濟困難，伊攏會一項一項去面對，看著伊，koh 倒轉來看看我家己，我感覺我有真濟需要加強ê所在，有真濟我tú-tio̍h ê困難佮伊比起來攏總無算啥物--a。

不倒ê蘆葦這本冊我真佮意，佇這本冊內面我學著真濟好ê道理，我希望會當介紹予沒看過的同學知影。